بسم اللہ الرحمن الرحیم
انا للہ و انا الیہ راجعون
ایرانی عزیز قوم
عظیم امت مسلمہ
عظیم مجاہد، خطے میں مزاحمت کے علمدار، بافضیلت عالم دین اور مدبّر سیاسی رہنما جناب سید حسن نصر اللہ رضوان اللہ علیہ لبنان کے کل رات کے واقعات میں شہادت کے درجے پر فائز ہوئے اور بارگاہِ الٰہی کی جانب پرواز کر گئے۔ مزاحمت کے سید عزیز نے اللہ کی راہ میں دسیوں سال جہاد اور اس کی دشواریوں کا صلہ ایک مقدس جنگ میں حاصل کیا۔ وہ ایسے عالم میں شہید ہوئے کہ بیروت کے ضاحیہ علاقے کے نہتے لوگوں کے دفاع اور ان کے تباہ شدہ گھروں اور جاں بحق ہوئے عزیزوں کے لیے منصوبہ بندی کرنے میں مصروفِ عمل تھے، اسی طرح انہوں نے دسیوں سال سے فلسطین کے ستم دیدہ لوگوں کا دفاع، ان کے غصب شدہ شہروں، دیہاتوں اور ویران گھروں اور ان کے قتل کیے جانے والے عزیزوں کے لیے منصوبے بنائے تھے، اور جہاد کیا تھا۔ ان تمام مجاہدت کے بعد شہادت کا عظیم درجہ ان کا مسلم حق تھا۔
عالم اسلام نے ایک عظیم شخصیت کو، مزاحمتی محاذ نے ایک نمایاں علمدار کو اور حزب اللہ لبنان نے ایک بے نظیر قائد کو کھو دیا ہے، لیکن ان کے دسیوں سالہ جہاد اور تدبیر کی برکتیں کبھی بھی ختم نہیں ہوں گی، انہوں نے لبنان میں جو بنیاد رکھی اور مزاحمت کے دیگر مراکز کو جو سمت عطا کی وہ نہ صرف ان کے فقدان سے ختم نہیں ہو سکتی، بلکہ ان کے اور اس واقعے کے دیگر شہیدوں کے خون کی برکت سے اسے مزید استحکام حاصل ہوگا۔
صیہونی حکومت کے کمزور اور زوال پذیر ڈھانچے پر مزاحمتی محاذ کے حملے، اللہ تعالٰی کی مدد و نصرت سے شدید تر ہوں گے۔ صیہونی ناچیز حکومت کو اس واقعے میں فتح حاصل نہیں ہوئی ہے۔
سیدِ مزاحمت، ایک شخص نہیں تھے، وہ ایک راہ اور ایک مکتب تھے اور یہ راستہ بدستور جاری رہے گا۔ شہید سید عباس موسوی کا خون رائیگاں نہیں گیا، شہید سید حسن کا خون بھی رائيگاں نہیں جائے گا۔
میں سید عزیز کے والد گرامی اور ان کی اہلیہ محترمہ کی خدمت میں، جو اس سے پہلے اپنے ایک بیٹے سید ہادی کو بھی خدا کی راہ میں پیش کر چکی ہیں، ان کے محترم بچوں، اس واقعے میں شہید ہونے والوں کے اہل خانہ، حزب اللہ کے تمام افراد، لبنان کے عزیز عوام اور اعلیٰ حکام اور پورے مزاحمتی محاذ اور پوری امت مسلمہ کی خدمت میں عظیم نصر اللہ اور ان کے شہید ساتھیوں کی شہادت پر مبارکباد اور تعزیت پیش کرتا ہوں اور ایران اسلامی میں پانچ دن کے عام سوگ کا اعلان کرتا ہوں۔ خداوند عالم انہیں اپنے اولیاء کے ساتھ محشور فرمائے۔
والسلام علی عباد اللہ الصالحین
سید علی خامنہ ای
28 ستمبر 2024
